عون الرحمن

قصة كاميليا شحاتة

شرح كتاب العبادات

ما هكذا تورد الابل يا جمعة!!!؟

الاثنين، 7 فبراير 2011

مخـك تخـين

مخـك تخـين



عبد السلام البسيوني | 03-02-2011 23:04

مخك تخين

مش هتفهم فيما يبدو يا غبي

مش هاتعرف مهما قلنا

إن كل الناس خلاص

عقلهم صار مختلف

إنك يا باشا منزلق في منعطف

والشعب جيّ بغضبِتُه.. وبعزمِتُه وبشدِّتُه

هايدوس عليك

إقالة ايه؟ وحكومِة ايه؟

لسه هاتسيب لينا حزبك؟

لسه هَتورينا وشك؟

لسه هاتسلط كلابك ياكلوا شعبك؟

انت إيه؟

صنفك ايه!؟

مش كفاية يا جبان؟

مش كفاية إللي كان؟

مش كفايانا اللصوص النهابين؟

مش كفايا المرتشين الخائنين

والبقية من عصابتك؟

اللي باعوا لنا أصولنا

واللي شلوا لنا عقولنا

واللي ربَطونا بْسلاسل

في التفاهة والسفاهة والتسطح

أهل الوساخة والحقارة والتبجح

مش كفايانا نظيف؟ والشريف؟

وابن عادلي وابن عز وابن زفت؟

نفسي أعرف مرة واحدة يا زعيم انك فهمت

مش كفاية إنكسارنا وانحدارنا وانهيارنا؟

مش كفاية جوع ولادنا وحال بلدنا!؟

وموت أملنا

وانحسار طموح رجالنا!؟

مش هايشفي كل مصري

إلا لما تكونوا يا جنتِل مسجونين

إلا لما تكونوا في السجون... متربّطين

ويحاسبكم شعبكم عما نهبتم

عما أضعتم.. عما بطشتم.. عما غدرتم

من جسمكم لازم تحصل مصرنا ثمن العمالة

ثمن الخيانة والنطاعة والندالة

لازم تصفوا في زنازيكم صفوف

لازم تدوقوا ع القفا طعم الكفوف

اللي ناسكم شِبعوا منها

اللي ناسكم قرفوا منها

ياللي أهنتم شعبكم

ياللي شتمتم ربكم

ياللي نهبتم أرضكم

ياللي لغيتم مصركم

من خَااارِطة دول التقدم والحضارة

يا ميت خسارة

يا رب ترحم مصر من عسكر لصوص

حولوها للأسف قشقلاق وميري

كبسوا على عقلي وضميري

وعيِّشونا ف معتقل واسع كبيييييييير

ناس بلا ذمة وضمير

يا رب ترحم عقلها من ناس بيادة عقلهم

سرقة بلدنا هَـمِّهُم

من قرع مادد أفرُعُه بره البلد

يا رب ترزقها بولد

وطني ومخلص متقي

مش أرزقي

ولا حلنجي ألعبان

يا رب عوضنا براجل

عقله صاحي.. وقلبه صاحي

قلبه ميت.. مش جبان

راجل جدع

يمسح عن البلد الوجع

يمسح دموعها اللي غرقت الشوارع

على ولادها اللي قتلهم

بالرصاص الحي لما قالوا لأ!

الله حي والله حق

والليل هاييجي بعدُه ضي

والحق جي.. والعدل جي

الله حق والله حي

ليست هناك تعليقات:

إرسال تعليق